تعلموا من حميد ودويد!!!
بصراحه احنا عايشين في بلاد رائعه بكل المقاييس ...نكت ومسرحيات بالجمله......عجايب ومواقف طريفه لقد بينك الا قدره على الضحك ...ماشاءالله_تبارك الله_القيادات تتقاتل فيما بينها ..دويد يرسل بلطجيه للاعتداء على العضو البرلماني ورجل الاعمال الشيخ حميد الاحمر!!الشيخ حميد بدوره يرسل اتباعه للاعتداء على المحافظ القبيلي ابن القبيلي!!هذا يشتكي ويؤكد انه بريئ وذاك يشتكي ويحكم القبايل !!!....والشعب اليمني كعادته الدائمه لايتفرج ولايشجع....بل يحلل الموضوع ويقوم بدراسته كاملآ _في مجالس القات طبعآ_وتنقسم الاراء فهذا يؤيد حميد وذاك يؤيد دويد ..وهات ياصايح ولايح لحد ما يوصلوا للساعه السليمانيه ويقوم الجميع من المجلس وماقاخرجوش الى طريق.....
والامر العجيب في القصه ان مسئولينا هؤلاء لايحتكمون للقضاء ولايسرحوا محكمه وبصراحه يعجبوني فالقضاه مش فاضيين لهم ورائهم الارهابيين والخارجين عن الجانون والمارقين اللي يشتوا يجروا البلاد للفوضى..ويبدوا ان الشيخ حميد ينظر لها من ناحيه اقتصاديه ...بدل مايروح للقسم ويدفع عشرات الالاف حق الطقم والعسكر يرسل بالمبروكين يعلموا دويد الرجاله وصلاتك على النبي ...ودويد كذالك يشتي يعرف الشيخ حميد ان وراءه رجاجيل وحمران العيون يدقوا الحديد وعاده حامي ومستعدين لانهار من الدماء اذا لزم الامر ... والاثنين كذالك شكلهم يشتوا يفهمونا ان عادهم قادرين يعصدوا الدنيا عصيد فمابش داعي نحلم بدولة النظام والقانون....
.تعجبني الدوله حقنا في مثل هكذا مواقف _تتفرج من بعيد وتخليهم يتناطحوا لوما يشبعوا والفائز يصفقوا له.... الشي المخجل والقبيح في الموضوع ان المتناطحين الاثنين متعلمين ومثقفين ويتبوئوا مراكز مرموقه في الدوله اليمنيه وحريآ بهم ان يكونوا قدوه لعامة افراد الشعب وان يكونوا اول من يطبق القانون ويشيد به ....
فالشيخ حميد الاحمر _دكتور ومعارض سياسي له باع طويل ودائمآ مايندد وينتقد الفساد والفاسدين وينادي بتطبيق القانون ...اضف الى ذالك انه عضو برلماني في مجلس النواب ...هذا غير انه تاجر عملاق ومعروف.....
والاستاذ دويد كذالك انسان متعلم ومثقف وله باع سياسي طويل ويشغل منصب محافظ محافظة صنعاء وكان حريآ به ان يكون قدوه ومثالآ يحتذى به وان يسعى جاهدآ لتنظيف العاصمه من الفاسدين ومحاسبتهم احسن له م الظهور في قناة المؤتمر لشتم الشيخ حميد امام الملأ والتلفظ بالفاظ وتهم غير لائقه وعيبآ ان نراها تصدر من شخصآ مثله!!!
انا بصراحه بعد هذه المسرحيات التي نشاهدها منهم بين الحين والاخر فكرت اروح لاحد القضاه في واحده من المحاكم الشهيره ..اعتذر له وابوس ركبه عشان يقبل تنازلي عن القضيه اللي له اربع سنين ماكملهاش !!!
والتي تجري احداثها بيني وبين واحد ريتش فتح عليه ربي واتعرف بالخبره والان النجوم على كتفه بلاعدد ......تصدقوا انه لما يجي المحكمه نقوم نتمم له كلنا_انا والقاضي_والعسكر والحضور وانا خايف يقوم يعمل مثلهم ويرسل لي شاص قديم محمله بالدواشين وانا بصراحه مش ناقص!!!.......
| مغترب كلام في محله والى متى هذه الفوضاء | ||
| فهمي المشولى المشولى تعجبني الدوله حقنا في مثل هكذا مواقف _تتفرج من بعيد وتخليهم يتناطحوا لوما يشبعوا والفائز يصفقوا له.... الشي المخجل والقبيح في الموضوع ان المتناطحين الاثنين متعلمين ومثقفين ويتبوئوا مراكز مرموقه في الدوله اليمنيه وحريآ بهم ان يكونوا قدوه لعامة افراد الشعب وان يكونوا اول من يطبق القانون ويشيد به | ||
| Ali Thamari Too funny I like this. | ||
| محمد صادق الحميدي ضوضاءعجيبة وشعب اعجب،ولا فائدة إلا بدولة مؤسسات لاقبليات ومافية،وباستقلالية القضاء والجهات التنفيذيةوحيادية الاعلام لكن السبب في نظري اخي سمير هو بيع الوطن وشعبه للمافية لاجل الكرسي بل ومشاركتةالمافيه | ||
| عبد الناصر الحمادي كلام صحيح وصح لسانك أخي /سمير الصلاحي ده طبع الشعب اليمني وعلى ما قيل الطبع غلب التطبع..... بس انت من واجبك مش ترووح تتنازل على حقك هاذا يسمى خوف اما ان كان قصدك ثاني فالله من وراء القصد تحياتي. | ||
| صلاح الصلاحي والله احنا ننشر الخبر ونحلل ونتعب واليوم حاشد تحكم دويد وانهم اصحاب وخبرة والداخل بينهم خسران بس من يتحمل الضحية الذي هو صاحب الورشة المجاروة لمنزل نعمان دويد بس انا اعتقد يدفعوا ثمنه ويعيشوبسلام |