مساواة في المولعة!!
مرحبا بكم معنا في العدد الجديد من القالب الصحفي الكوميدي "حكايتي مع الشارع والتي تحمل في جنباتها مناقشة العديد من القضايا والظواهر التي تتعلق بشؤون المجتمع سواء من الجانب السلبي أو الايجابي بأسلوب كتابة نص حواري باللهجة الشعبية ولكنة عدنية من الطراز الأول.
إذا لا أطيل عليكم أعزائي فلنخوض معا هذه القصة التي بدأت تتفاقم في ذروتها يوم بعد يوم إلا وهي ظاهرة مضغ القات"الحسوك" بين فئات النساء وخصوصا في أوقات الإجازات وتتمثل في عيد الأضحى المنصرم من خلال هذه الحوارية الفاكهية بين الزوج والزوجة والتنافس الشديد والمحتدم في المساواة حتى إنها وصلت إلى حد الأكثر مولعة بهذا العشب الأخضر "القات"في التالي:
هدوء يسبق العاصفة في حارة "الموالعة " مع طيش وطماميش ومهرة وطبيخ ورائحة البارود وزنخة سبلة العيد المتبقية تملئ أرجاء البيت!!
فكرة وحوار:محمد فؤاد راشد:
**المنكدة(مدام مريرة):
"أوووووووف!!أووووووف ..ايش هذا التعب يالله احس جسمي مدقدق دقداق !!اكيد هذا كله من التخزينات حق العيد !!واتخيرا انتهت هدنة العيد بعد ماكانت كل تخزينة مع الحبيبات ياسعيد!!
**المنكد"مسيو ربيس":
"قولي ياصبح ياحرمة خلينا أروح الشغل من نكد لا نكد وزي نكدك ماشفت !!فزي اليوم وصلحي القرع !! ايش اظاهر السمر والمقيل الصباحي خبطلك الديلكو والفيوز الباقي عندك........
**المنكدة (مريرة):
"آو آو ااااااااااو..مالك يارجال !!ايش فيبك جالس تبقبق وتحن زي الهيلو كوبتر..اهدئ شوف عادني بعقلي وصاحيالك تمام ..عده هذي جزاتي لما قمت ابيع الشولي حقي علشان اخليك تطفح الحسوك باليوم بالمبلغ الفلاني ...أخسسسس عليك ..وصدق الشاعر"إلي مايقدر يجازيك يصبح يعاديك"..
**المنكد"ربيس":
"اقولك اسكتي ياحرمة نقصي حقك الونان !!قيمتي الجيران علينا !!يعني مافيش ولو ساعة تمديد للهدنة !!معليش قدنا ايش با أسوي "لو يدك تحت الحجر اسحبها بالبصر "ده قده يبان عليه يوم توم وبصل..
**المنكدة(مدام مريرة):
"دلحين ايش معانا ومعك !!بتخليني أفكر من فين بااجيب فلوس الحسوك"القات"مابقى إلا( 500ريال) لا غير ..وعلى كلامك الي زي الرصاص !!دبر نفسك ورويني عرض كتافك !!والقلب دعيلك.
-"أصلا اليوم باضطر اختم السهراية بجلسة مقيل مع حبيباتي !!محمولة مشمولة !!وخالتي وخالتك وتفرقوا الخالات!!وياغافلين لكم الله...........
**المنكد(مسيو ربيس):
"ايوه ايوه !!قولي كده من البداية !!خلاص أنا قدنا اف !!وحريم الأنس والجن هم أحسن مني وأنا زوجك ياحرمة ابو عيالك !!دلحين أنا فين بااروح والدنيا جفاف تقرح صفير !! طيب خارجينا حرام عليك..
**مريرة :
"ياشيخ روح طلعت روحك !!استحي على نفسك وروح اتقلبلك هنا وهناك !!جالسلي زي خيال المأته !!لاتهش ولاتنش..........
-"شوف اني معي لك فكره وخراج من حكة الضروس !!بيع ساعة اليد حقك إلي جابها لك اخوك (الشحط)من السعودية !!واشتر يلك بفلوسها "الحسوك" حقك !!وسكيلي وجع الرأس ياوسواس!!.........
**"مسيو ربيس":
"دلحين هذه هي المساواة !!الي تشتوها !!يالطيف ايش خليتوا للرجال حاجة !!ماخليتم لنا حتا القات للنسيان والراحة !!حسبي الله ونعم الوكيل!!
اظاهر انقلبت الاية وبايصبح الحريم قوامات علينا !!ياساتر استر علينا دحنا غلابه !!ودقي يامزيكا........